Deanu beaiváduvvon guolástannjuolggadus boahtá fápmui miessemánu álggus
Dásseválddi presideanta nannii bearjadaga 26.4. Deanu guolástannjuolggadusa 2024-2023 ja dan fápmuibidjanlága. Beaiváduvvon guolástannjuolggadus lea fámus 1. miessemánu.
Riikkabeivviid dohkkehan Deanu beaiváduvvon guolástannjuolggadus boahtá fápmui miessemánu álggus. Dásseválddi presideanta Alexander Stubb nannii bearjadaga lága guolástannjuolggadusa fápmuibidjamii. Lágain maiddái dárkkálmahttit virgeoapmahaččaid doaimmaid guolásteami ordnemis ja guollenáliid dikšumis ja ásahit guolástanlobiid vuovdimis, hattiin ja lobiid ávkkástallamis.
Norggain sohppojuvvon Deanu guolástannjuolggadusa sisttisdoallan muddendoaimmat leat plánejuvvon beaktilin luossanáliid nanosmuvvama dáfus. Guollebivddu ordnema várás lea dehálaš, ahte Suomas ja Norggas lea oktasaš guolástannjuolggadus, man vuođul Deanus bivdojuvvo.
Luossanáliid heajos dili dihtii luosa bivddu evttohit muddejuvvot dásiid mielde, luossanáliid ealáskeami ja Deanu váldorokki eará luossanáliid goargŋunáiggiid mielde. Guolástannjuolggadus sisttisdoallá kritearaid das, mo luossabivdu rahppojuvvo luossanáliid ealáskeami mielde.
Heajos luossadili dihtii luossabivddu rahpan boahttevaš geasi ii leat velge vejolaš. Dán dihtii eará šlájaid, earret luosa, bivdinvejolašvuođat álkidahttojuvvojit.
Maiddái ruoššaluosa bivdui leat lasihan sierra guolástanvejolašvuođaid.
Dohkkehettiin ráđđehusa evttohusa Deanu beaiváduvvon guolástannjuolggadussan riikkabeaivvit attii guokte celkosa.
Riikkabeaivvit gáibida, ahte stáhtaráđđi čuovvu dárkilit Deanu luossanáliid dili. Sámiid nana rivttiid ja opmodaga suoji dáfus váttis guollebivddu ráddjehusdoaimmat bajásdollojuvvojit dušše dan dásis go dat leat vealtameahttumat luossanáliid buorráneami dáfus.
Riikkabeaivvit gáibida maiddái, ahte stáhtaráđđi ordne sorjjasmeahttun, juridihkalaš čielggadeami das, mo Deanu guollebivddu sáhttá ordnet vugiin, mii ráddje opmodaga suoji ja eará vuođđorivttiid nu unnán go vejolaš muhto váldá vuhtii luossanáliid dili.
Lassedieđut
Tapio Hakaste, ráđđádalli virgeolmmoš, luondduriggodatossodat, bivdodoalloovttadat, t. 0295 162 152, [email protected]
Sonja Falk, ministara sierraveahkki, t. 050 911 4546, [email protected]
